選擇題 : 究竟打蠟、鍍膜、PPF邊樣先適合自己？

成日都有身邊嘅朋友同客人問老細，究竟我應該打蠟定係鍍膜，其實答案好簡單，無論鍍膜又好打蠟又好，甚至貼PPF目的都只得一個，就係為車漆提供保護，防止外來污染物或者硬物直接破壞車漆。至於選擇邊樣產品去保護就好視乎個人喜好，以下做一個簡單嘅歸類，希望幫到各位車主朋友容易啲選擇適合自己嘅產品，不過如果你係一位由得部車日灑雨淋都一兩個月甚至三個月都唔洗一次車嘅車主，以上三樣都唔適合做，首先要做嘅係改變洗車習慣，定時洗車。

第一類 : 如果你係一個極度錫車，發現一條好幼嘅花痕，又或者比一粒石仔彈花頭冚都會心痛嘅車主，PPF絕對係你必然之選，PPF嘅優點係保護性強，可以防止一般刮花，石仔彈花漆面，而且唔會因老化而失去保護層，而缺點就係價錢較貴，日子耐咗會啞色，一啲比較差嘅物料會有殘膠同變黃，如果有酸雨漬或者水印比較難去除，可能要重新貼過，但係舊車翻噴過油或者補過油要有心理準備搣舊PPF嘅時候會發生甩油嘅機會。

第二類：如果你想部車一兩年內有層較堅硬嘅保護層，車身玻璃有較佳嘅跣水效果，洗完車比較乾淨，容易打理，保持車身光澤，減少洗車形成嘅太陽紋花紋，減少石仔彈花，咁你就比較適合做鍍膜，而缺點係對於外來力破壞時嘅保護性較PPF低，鍍膜層會隨時間慢慢衰退而失去跣水效果同保護力，一般一至兩年，視乎前置工序同鍍膜質素。

第三類：如果你對車身視覺效果要求唔高，平時都係代代步，淨係想簡簡單單對車身做個護理，唔想將車漆完全暴露係外界同空氣之中，又想有短期嘅跣水效果，咁我建議你兩三個月上一次棕櫚蠟就可以，DIY都唔難，而蠟嘅缺點就係無法防禦外來力破壞，輕微磨擦都有機會產生花痕，last嘅時間短，坊間有啲劣質嘅蠟更加會對漆面造成傷害。

希望以上嘅分類可以比到答案各位車主朋友，但係有一點觀念好重要，就係無論你決定選擇鍍膜、打蠟或者PPF都好，都唔係萬能，係需要配合返車主日常基本洗車打理，先可以保持最佳嘅功效。

#粉嶺 #汽車美容 #北區 #洗車 #飲咖啡 #coffeeholic #sgcbtaiwan #預洗 #coating #研磨 #抛光 #鍍膜 #detailing #求其洗不如唔好洗 #洗車送咖啡 #cappuccino #latté #caramellatte #米高潔汽車消毒塗層